As pilgrim aw e Camino del Norte
Iinjsen oufschalte, tu ham seelew fine unti uk da äine krooplike gränse ütfine – et jeeft maning grüne for än gung aw pilgrimräis aw en Jakobswäi. Jakobsweege jeeft et önj hiilj Europa. Arken pilgrimwäi, wat eefter Santiago fjart, weer e knooke foon e hilie Jakob lade schan, håt sü. Da beest kånde san da, wat önj Spaanjen lade än uk diräkt bit eefter Santiago fääre. Forålem e frånsche wäi, e Camino Frances, looket önj sam iirnge mör as hunertduusend manschne önj. Huum et liiwer rouier än iinjsoomer heet, di namt en oudern wäi, tum biispel e Camino del Norte, wat uk e küstewäi nåmd wårt. Di fjart nämlik foon Irun bai e gräns tu Frånkrik åltens diräkt bai e küst långs eeftert ååsten. 860 km san et foon heer eefter Santiago – än uk 16.000 huuchdemeeter. Deeram wårt säid, e Camino de Norte as e swåårste foon åle pilgrimweege önj Spaanjen. Ouers uk e schöönste. Di wäi fjart döör önjt gehiilj fjouer prowintse, jarst döört Baskenlönj, dan döör Kantaabrien, döör Astuurien än döör Galiitsien. Besuners e jarst waag döör e baskische bärje hiirt tu e schöönste pårte foon e tuur. Uk wan huum ouer huuge bärje låpt, di een as huum duch wider bai en strönj än en küstestää önjlångd, tum biispel Zarautz unti Donostia – San Sebastian, iinj foon e smukste stääse önj Europa. Uk döör e baskisch hoodstää Bilbao fjart e wäi.
Deereefter wårde e bärje maner, än önj Kantaabrien fääre lunge oufsnite ouer grute strönje ma kristalween wååder. Jarst önj Ribadeo, e jarst galiitsisch stää, wan huum foon Astuurien kamt, biit e wäi foont wååder ouf än fjart nuch iinjsen döör e bärje, bit huum dan aw e Monte do Gozo äntlik Santiago siinj koon. Än wan huum deer dan önj e doom stoont, dan het huum sin 860 km lung pilgrimräis schååfd.
Aw e spaanische pilgrimweege jeeft et en neet foon pilgrimherbärje. Aw e Camino del Norte fåliwas lung ai sü maning as aw san gruten brouder, e Camino Frances. Ouers et långt, än mååstens fäit huum uk en beed. Am önj e herbärje tu ouernåchten än am ouerhood uk as ofisjäle pilgrim unerwäis tu weesen, brükt huum san pilgrimsütwis, di Credencial. En beed önj en öfentlik pilgerherbärje koost mååstens süwat 5 € unti uk bloot en spände. Följk släipet ma bit tu 40 moon önj en gruten sool önj latje etagenbeede. Huum sin oropax tu hüs ferjin heet, namt ham nü for än säk di läädere däi for en afteek. Ouders as aw e Camino Frances jeeft et önj e herbärje aw e küstewäi önj e räigel nån köögen, sü dåt huum salten seelew kooge koon. Dåt as forålem en probleem for da, wat lunge etape luupe än ai sü eeder bait däismüülj önjkaame. Foon 17:00 bit 21:00 hääwe nämlik åle restaurants tacht än följk fäit ninte tu ääsen. Än di een am nüügen wal huum ninte mör ääse, deer schal följk ham klåår for e nåcht mååge, dan am e klook tiin wårt önj e herbärje et jåcht ütknipsed. Natörlik koon huum önjstää foon en herbärje uk en pensjoon unti en hotäl naame, wat uk ai jöör san önj Spaanjen. Ouers följk mötj ai ferjeese, dåt e pilgrimherbärje ai bloot en unerkamst san, ja san uk en drååwpunkt for e pilgrime üt e hiile wråål. Manschne, ma wat dü hu deege lung ouer e baskische bärje lim bast, drååwest dü tou waage lääser wider önj en astuurisch pilgrimherbärje. Ouerhood, följk drååwet ham åltens wider aw e Camino del Norte, uk wan et räägnerisch goorai gunge koon. Et san uk bloot en påår duusend arks iir, wat e wäi luupe. Bloot süwat 15% begane önj Irun än kaame uk wörklik tu fötjs önj Santiago önj. Manstens fjouer waage schal huum deerfor räägne, wan huum wörklik fit as. Bääder san fiiw bit seeks waage, wan huum uk iinjsen en däi ai luupe wal.
Wan huum dan irgentwan äntlik önj Santiago önjkiimen as, schal huum natörlik uk deer en was plächtprogram mååge, wat ham ouer duusend iir for e pilgrime sü inspald heet. Önjt pilgrimskantoor fäit huum sin Pilgrimurkunde, e sünåmd Compostela, wat eefterwiset, dåt huum da leeste 100 km tu fötjs unti da leeste 200 km ma fiilj unti haingst unerweegens wus. Dan gungt et tu e pilgrimhoow önj e doom. Awfoorie schal huum natörlik döör e Jakobsschrain luupe än e göljn staatue ameerme. Dan gungt et dil tut greeft, weer sin kast lait.
Wan huum dåt dan ålet ääder ham heet, dan mötj huum dan uk äntlik önj iinj foon da maning krouwe gunge än bai cerveza än tortilla ma oudere pilgrime e räis nuch iinjsen forbai tiinj lätje. Wan huum deerbai büte sat, dan wårt huum åltens wider manschne forbailuupen siinj, ma wat huum irgentweer önj Bilbao ål iinjsen en biir drunken heet, än weer huum sääker wus än drååw ja uler wider. Ouers hü et sü as, åle weege fääre irgenthü eefter Santiago de Compostela. Gary Funck