Friisk Foriining – iirsberucht 2011/2012

Friisk Foriining – iirsberucht 2011/2012

Tu üüs leest lasmootefersoomling (14. april 2011) kömen 33 lasmoote än geeste. Uurdfäärer wörd Claas Riecken, et prutukol heet Lars Harms schraawen. Et üülj stjör wörd uk et nai stjör, bit aw Thede Boysen, wat ai wider kandidiird as baisater. Et stjör heet et prutukol foon e lasmootefersoomling aw en drååwen e 17. moi gödjkånd.

Sunt e leest fersoomling köön we en ra naie lasmoote bai üs önj e feriin apnaame. Dåt wjarn: Uwe Menke, Gerhard Bastrup, Annegret Schmieder, Annegreth Brodersen, Beate Ostermeier, Artur än Monika Schlüter, Sabine Wulf än Sinje Funke. Ouers et san kiiwenooch uk en ra lasmoote störwen. Foon üs gängen san: Margarete Johannsen, Snootebel, Hans-Werner Popp, Flansborj, Marie Meyer, Schååflönj, Juliane Gerhard, Moosbel, Adeline Petersen, Kil, Hans Hoeg, Kairem än Ingeborg Hansen, Bräist. Da leeste biise nåmde wjarn lungiirie stjörlasmoote.

 

Tut leest årbesiir

• For Frisia Historica begand et årbesiir ma en noopemårket än madelåler e 22. april. Dåt we ma di floose en gou tuhuupeårbe hääwe, wiset ham t.b. deerönj, dåt ja üüs fersoomlingshüs önj Stääsönj fliitji njüte, än dåt we gemiinsoom en brükden önjhainger önjschååfed hääwe.

• E 12. moi 2011 häi üüsen ålereklub san uursütfluch eefter Buumel än Triijarnsåk.

• Made moi wus en delegatsjoon üt Nordfraschlönj ma üüs tweed forwüset Ilse Johanna Christiansen tu en internatsjonaal kultuurwaag önj Disentis önj Grabünen.

• Foon e 26. bit 28. moi häi e Friisk Foriining lååsid tu en spånktuur långs ma e weestlike hiirewäi.

• Bai e FUEV-kongräs foon e 1. bit 4. juuni önj Wien wus e Foriining ma Ilse Johanna Christiansen än Antje Arfsten fertrin.

• E 4. juuni demonstriirden we et gibseln for e besäk üt Bousis/Frånkrik, wat tut jubiläum foon e Lunhamer toorpsplåts önjräisd wus.

• Tuhuupe ma e Frasche Rädj häi e Foriining e 15. juuni tu en fordreeging eefter Bräist lååsid: Ludwig Elle snååked ouer di aktuäle lååge bai da sorbe.

• Et Friisk Hüs häi e 19. juuni e dööre ääm än wiset en bileütstaling foon Momme Nommensen. Da san nü nuch tu schüns – än tu kuupen!. Elephant Doubt, en nai band üt Flansborj, spaald büte fort hüs.

• Foon e 20. bit 22. juuni wjarn Christiane Bodenhagen, Manfred Nissen än Gary Funck ma da fraschschoulere üt Bräist aw en frasch fiiljtuur ouer eefter e Huuge.

• Foon e 8. bit 10. juuli häi Frisia Historica tut jarst grut madelåler-waagiinje eefter Naibel bai e wäile inlååsid. Önj di tuhuupehång häi e Friisk Foriining sin traditsjonäl gibselturniir jarling foon Risem Schölj eefter Naibel fleet.

• E 20. august heet ham et stjör foon e Foriining tu en klausuurdrååwen önjt Friisk Hüs drååwed.

• Ilse Johanna Christiansen heet e Foriining et waagiinje 20./21. august aw en infostånd foon e natsjonaale manerhäide bait bundesbanenministerium önj Berlin repräsentiird.

• E 27. august måågeden we ma en naten floose foon 38 manschne üüsen samerütfluch ouer eefter Lungnees.

• Sunt e 1. septämber stroolt nü uk e raadiosiinjer Antenne Sylt üüs friiske tisinge arken warkeldäi ouert interneet üt.

• E 11. septämber heet e jöögedteooter-floose Dolores nuch iinjsen jare stuk ouer Pidder Lyng önjt Andersenhüs apfjard.

• 16 junge friiske gängen foon e 3. bit 7. oktoober ma Ute Jessen, Christiane Bodenhagen än Thora Kahl aw spräkeräis eefter Weestfraschlönj.

• Tu üüs Friisk Harfsthuuchschölj foon e 7. bit 11. oktoober wjarn we wi awt dånsch huuchschölj önj Jarplund. We häin dåttooch mån süwat 25 diiljnaamere, deermade uk däisbesäke.

• E 13. oktoober wjarn üüs ålere lasmoote aw harfstütfluch eefter Nordströnj.

• Saneene, e 15. oktoober häin üüs waane foon Frisia Historica eefter Stääsönj lååsid tu en madelåler-noopemårket ma boogenschiitjen.

• Äntlik wus et sü wid: Eefter en lungen forluup luked et e 21. oktoober än stal önjt KZ Sachsenhausen bai Berlin en tånkstiinj ap for Jens Mungard.

• Sunt e 1. nowämber häi Ute Jessen önj Risem wi en naien fraschkurs for önjfångere önj e gung. Gary Funck heet ouer e wunter da manschne foon Frisia Historica widerehülpen bai jare fraschliiren.

• Foon e 18. bit 20. nowämber drååweden jam teootermanschne foon möre aktiiwe floose tu en teooter-workshop önj Jarplund, organisiird än finansiird foon e Friisk Foriining tuhuupe ma e Frasche Feriin for e Ååstermååre.

• We foon e Foriining hääwe wi en moonschap üt Nordfraschlönj malded tu e fötjbål-europamäisterschap foon manerhäide, wat önj e juuni bai da sorbe for ham gungt. E 1. detsämber wörden deertu önj Berlin da ainkelte floose ütloosd: we spaale önj e forrunde iinj e kroaatisch manerhäid üt Serbien, da weesttrakier türke üt Greekenlönj än da ladiinere üt Italien.

• E 8. önj e jülmoune häi üüsen ålere-klub lååsid tu en fiirliken adwänts-eeftermadi önjt Galerie Café. Dåtheer tooch ma Christiane Bodenhagen än schoulere foont dånsch schölj üt Bräist.

• Kort for jül köön we tut jarst tooch uner di üülje, bekånde noome ”Üüsen äine wäi” en hiilj sid aw frasch önj Flensborg Avis präsentiire. Tubai da abonänte foue åål üüs lasmoote (ark hüsstånd) et blees amsunst ma e pust.

• En traditsjoon wårt widerefjar: et jüldrååwen, wat Gary ma en ra junge frasche di leeste saneene for jül döörfjart.

• Üüs wunterfäst ma gräinküüljääsen as åltens e jarste fraidi önj e februar:  jarling fiirden we wi ma ouer 100 moon tu en nai teooterstuk foon Dolores: ”Di weene planeet”. Uk üüsen goue waane Jan Graf köm bait puublikum gödj önj ma siun frasche än plååttjüsche stöögne.

• Made Februar köö et Instituut en nai mörspräket Nordfraschlönj-loonkoord präsentiire. Et giilj deerfor häi e Friisk Foriining ouer e bait dånsch unerruchtsministeerium inwörwen.

• Tut biikebrånen (21. februar) häin da frasche feriine Rökefloose, Frasche Feriin for e Ååstermååre än Friisk Foriining jarling wi eefter Risem önjt ”Fraschlönj” lååsid. Di åmtsdiräktor foon Söödtuner, Otto Wilke, hül e biikenreede. E Rökefloose häi ekstra for di däi et teooterstuk ”Faust” inööwed, än awäädrie spaald Dirk Bork ap tu doons.

• E 6. märts wus dan wi Frisia Historica önj e ra ma en noopemårket än en latjer madelåler-looger.

• Saneene, e 31. märts, köm et ouder tooch ”Üüsen äine wäi” ma Flensborg Avis rüt tu åle lasmoote.

 

Wat ouers sü låpt

• Üüsen ålereklub drååwet ham widerhaane iinjtooch önj e moune önj Lunham önjt Galerie-Café tu en meekliken eeftermadi ma forleesen, koordespaalen än snååk.

• Bai Marie Tångeberg kamt ouf än tu en floose foon e Horninger Fräische Feriin aw besäk. Ja leese, foue forlääsen än hääwe en gou snååk maenouder.

• Et stjör heet ham önjt fergängen årbesiir oocht tooche tu meetinge önj üüs fersoomlingshüs önj Stääsönj drååwed, am da feriinsaktiwitääte än oofting uk giiljsååge tu behooneln.

• Foon üüs lasmooteblees ”Friisk Tising”, wat üüs lasmoote ma e pust foue, san önj e luup foont iir sü as ploond fjouer ütgoowe rütkiimen.

• Sunt trii iir jeeft et nü foon moundi bit fraidi tisinge aw frasch, finantsiird foon e Foriining än spräägen foon Gary Funck. E siinjing kam nü åltens am e kl. nüügen di mjarn eefter e siinjing foon Friisk Funk, aw Antenne Sylt än as uk önjt interneet uner „friiskforiining.podspot.de“ tu ark tid tu hiiren.

 

Wat kamt

• Fort luupen iir san we ma en nordfriisk tiim bai e Europeada önj e Lausitz deerbai (16. bit 24. juuni).

• We ploone en spräkeräis eefter Söödtirool tu da ladiinere (1. bit 8. juuli).

• Üüsen samerütfluch (18. august) gungt jarling eefter Ääderstää.

• Än dan as deer wi en friisk harfsthuuchschölj önj Jarplund (5.-9. oktoober).

• Üüs 4. manerhäide-filmfestival gungt jarling uk wi önj Hüsem for ham (22.-24. nowämber).

Tu dadeere forheewen måå ik jam nü ål åltumååle inlååsie.

 

Jörgen Jensen Hahn, 1. formoon

Lasmoot wårde

Wård lastmoot önj e Friisk Foriining

Hark iinjsen

Di frasche podcast for enarken wat hål frasch hiire wal.