Jarst stjördrååwen mat nai stjör

Eefter e lasmootefersoomling önj e stormmoune, weer et stjör foon e Friisk Foriining mååst en gåns nai tuhuupeseeting füngen heet, häi et stjör täisdi di 23. önj e mistmoune sin jarst stjördrååwen. Et wörd fååstläid huum e feriin am beesten önj da ünlike feriine än organisatsjoone repräsentiire schal, weer e Friisk Foriining en sat heet. E forwüset Ute Jessen fertreet e Friisk Foriining bait loondäisgremium, önj e samråd än önj e hovedstyrelse foon e SSF. Claas Riecken schal önj tukamst e Friisk Foriining önj e Frasche Rädj repräsentiire än Marie Hahn wörd repräsentant önj e Friisk Stifting. Uk wörd deeram diskutiirt hü e Friisk Foriining da stjördrååwen önj tukamst organisiire wal. En nai protukulstruktuur schal deerbai heelpe, dåt teeme strukturiirter diskutiirt wårde koone, än da lasmoote koone eefter arks stjördrååwen aw e hüüsesid eefterleese weeram snååked wörden as. Bait iinje wörden nuch da termiine fort iir 2022 fååstläid, wat uk aw e hüüsesid for en arken tu finen san.