Nai manerhäiderucht beslin!
3. önj e krölemoune 2016
E loondäi önj Kil heet en nai manerhäiderucht beslin. Deereefter koone bräiwe tu e ferwålting önj e tukamst uk aw frasch, dånsch unti plåttjüsch ferfooted weese. Deerbai as et såchtetseelew, weer et ham am insäkne, önjfrååge unti ålgemiine schraftferkiir hoonelt. „For e manerhäide as dåtdeer öfentlik gödjkånen foon jare spräke en gruten wanst“, stald e fraksjoonsbåås foon e SSW, Lars Harms, fååst. For da frasche jeeft et nuch en ouder besunerhäid. Wäiwisere eefter än önj nordfrasche stääse än toorpe, dadeere gööle strooteschilde, schan önj e tukamst uk da frasche noome ma apfääre.