Kultuurkonsulänt iirsberucht 2012/2013
Årbesberucht kultuurkonsulänt
2012/2013
Spånktuur ouer hamelfård (17.-19.5.)
Eefter e jarst lasmootefersoomling wus e jarste grutere programpunkt e spånktuur foon e Foriining ouer hamelfård. Eefter 2011 wus et nü et tweed tooch, dåt ik en spånktuur ouer hamelfård foon törsdi bit saneene organisiird hääw. Dåtheer tooch gäng et ouer e sünåmde „Wikinger-Friesen-Weg“ foon Danewärk eefter Taning. Släipen hääwe we for latj giilj önj e turnsoole foon e dånsche schoule önj Treia än Freedaistää. Jarling hääwe önjt gehiilj ål oocht moon mamååged. Uk 2013 wårt et wi en tuur jeewe.
Europeada (16.6.-24.6.)
Bai e fötjbål-europamäisterschap for manerhäide önj e Lausits hääw ik üüs tiim da jarste tra deege en lait pååsed, bit Manfred me as ofisjäle „tiimliidjer“ oufliised heet. Likes wus et en spånen erfååring ma üüs dränge foon SV Frisia.
Gibselturniir (30.6.)
Sü as uk ål önjt iir awfoorie hääw ik üüs grut gibselmäisterschap uk jarling wi önj e rååme foon e madelålermårket foon Frisia Historics bai e wäil önj Naibel döörfjard. Di pokaal gäng jarling wi tu Frisia Historica. Önjt gehiil hääwe seeks moonschape maspaald.
Spräkeräis eefter Ladiinjen (02.-08.7.)
E spräkeräis 2012 fjard tu e ladiinsch manerhäid önj e Dolomiite önj Itaaljen. E räis wörd foon me än Manfred organisiird än ik ban uk seelew as räiseliidjer ma kjard. Positiif fälj forålem ap, dåt we gåns maning naie ma häin. Süwat e haleft foon e diiljnaamere wus nuch uler ma aw spräkeräis.
Harfsthuuchschölj (05.-09.10.)
Bait Friisk Harfsthuuchschölj önj Jarplund hääw ik tuhuupe ma Güde Boysen ouer e hiilje tid en teooterworkshop for jöögedlike döörfjard, wat foon oocht junge manschne beseecht wörd.
Ån een hül ik deertu nuch en fordreegen am min pilgrimtuur döör Spaanjen än natörlik jäif et uk wi en knüfelkurs.
4th European Minority Film Festival (22. – 24.12.)
Et film festival as ai bloot foon e årbestid åltens ån foon e grutste bunke önjt årbesiir. Et tustalen lüp ouer e tid foon süwat en huulew iir.
Et fiird festival wus was et beest, wat we bit nü döörfjard hääwe. Nuch uler wjarn deer sü maning wichtie filmmanschne eefter Hüsem kiimen as jarling. Da tukiikertåle bai e forfääringe önjt Hüsemer kiinotsenter wjarn besuners da biise leeste eene okay. E gala di saneene een önjt Husumhus wus jarling besuners gödj beseecht, sü dåt stoule deeretu stald wårde schönj.
Ouerdåt et årbespensum foon 1,5 årbesstäägne (Manfred & ik) tubait däik årbe ouerhood ai banefor e betååld årbestid tu schååfen as, schal her flicht sänj wårde, dåt huum tumanst for e leeste twäär moune en heelper aw 450 € basis instald wårde koon.
Mat filmfestival heet e Foriining et schååfd än mååg har en noome önj Nordfraschlönj uk bütefor e manerhäidetseene.
Jöögedteooter Dolores (12.2012 bit 03.2013)
Ouf detsämber gäng et wi lüüs mat ööwen än instudiiren foont nai stuk for üüs jöögedteooter Dolores. Et stuk „Et koostet bloot en mamuuttäis“ hääw ik, sü as uk da tou iir awfoorie, seelew schraawen än tuhuupe ma Güde Boysen önj tseene seet. Ai maner as 13 (!) junge schauspaalere hääwe dåtheer tooch maspaald. Et stuk wörd apfjard bait wunterfäst (02.02.13) än nuch iinjsen önjt Andersen Hüs.
Jülütfluuch (22.12.)
Tradisjonäl biidj ik åltens di leeste saneene for jül üüsen tradisjonälen jütütfluuch tu „müüstische“ stäägne önj Nordfraschlönj önj. Teema dåtheer tooch wus „unergängene toorpe“. Kiiwenooch wus et wääder dideere däi oueremätje hiinj ma storm än snii, südåt we ai mör as ån woin ful füünj köön. Ouers tumanst as et ai ütfeelen, än ik hoow, e floose heet dåt iinj än ouder am üüs hiimstoun deertu liird. Foont schölj wårt önj dideere berik je goorninte mör fermadeld, sü as ik arks iir wi fååststale schal.
Teooter Rökefloose än biike 2013 (21.2.13)
Fort biiketeooter hääw ik et teooterstuk „Da üülje, da goue“ schraawen än hääw uk iinjsen wi seelew maspaald. Et stuk wus flicht en lait ouders as följk et foon frasch teooter waanid wus än nüm uk wi betuuch aw üüs histoorie. Ik hääw et fermousem, et as likes bili gödj önjkiimen.
Frasch kurs
Sü as arks iir, hääw ik uk jarling wi ouer e wunter en fraschkursus önj Stääsönj önjbin. Di kurs låpt nuch bit måi än wårt teoreetisch foon tiin moon beseecht, wan åle deer san. Dåt köm ouers nuch uler for 😉
Bütefor da heer apstalde punkte jeeft et natörlik uk ålerhönj latj årbe, wat åltens en gruten diilj foon e årbestid ütmååged. Deertu hiire t.b. et beswååren foon maning emails än önjfrååge, ouerseeten/ferbäädern unti et diiljnaamen bai meetinge än stjördrååwene.
Gary Funck
kultuurkonsulänt