Frasche bjarnesunge
Sü kaame ma di „Kreativ-Tonie“ frasche schunge än tääle tu de än din bjarne. En önjlaiting
Wan Dü än din bjarne håål frasche hiirspaale, tääle unti schunge hiire wan, gungt dåt fåli lacht: ma di „Kreativ-Tonie“. Huum lååsiet da frasche stöögne üt et internet dil än dan koone jam da hiire. E Friisk Foriining heet maning faine stöögene aw san YouTube-kanool, unti uk heer aw üüs hüüsesid.
Deertu schal huum en tonie-konto heewe (meine.tonies.de/login) än die tonie mat W-Lan ferbine. Dü schuchst di „Kreativ-Tonie“ awe sid än kröögest „Inhalte bearbeiten“. Nü koost dü da dataie ouretiie (drag and drop) unti ma „Dateien durchsuchen“ aw dan pc fine; deer scheet „öffnen“ krööge. Dil tut iinje luupe (scrol) än aw „Inhalte speichern“. Dåt brükt en schöör, bit di rüüdje bulke döör as. Dan „Inhalte speichern“.
Nü namst dü di „Kreativ-Tonie” foon e boks än kröögest tri sekuunde iinj foon da binge uure bit dü en ween jocht schuchst. Nü as åles lååsiet än di „Kreativ-Tonie“ koon tubääg. Hi jochtet gräin. Lüüs gungt et! Foole spoos bait hiiren.