Friisk Foriining – iirsberucht 2017/2018

Iirsberucht 2017/2018

Tu üüs leest lasmootefersoomling (16. märts 2017) kömen 27 lasmoote än soowen geeste. Uurdfäärer wus Alastair Walker. Et prutukol, schraawen foon Ute Jessen, wörd foont stjör aw en drååwen e 12. moi 2017 gödjkånd.

Sunt e leest fersoomling hääwe we as naie lasmoote bai üs önj e feriin apnümen:

Famili:

Frerk än Anita Jacobsen ma jare bjarne Gönna-Lotta än Tjark Lewe Jacobsen,

Daniel Meerbote ma sin bjarne Runa än Mads Meerbote,

Marianka än Lars Christiansen ma jare bjarne Hanna, Jannes än Jonne Christiansen,

Eike än Florian Christiansen ma jare bjarn Edda Christiansen,

Stephan än Lena Erichsen ma jare bjarne Jule Mathilde än Lasse Nikolaj Erichsen,

Boy Peter Friedrichsen än Herta Friedrichsen

Ainkelt:

Horst Schöne, Karl-Heinz Jakobsen, Robert Kleih, John Frederiksen än Philipp Micha,

 

Störwen san önjt fergängen årbesiir: Ketel Lorenzen, Hannemarie Nommensen än Carla Petersen.

 

Tut leest årbesiir

• Et jarst teooterstuk ”Da üülje da goue” foont nordfriisk teooter kö di 2. april sin premiere fiire. Ma tjüsche ouertiitel köön uk manschne wat niinj frasch ferstönje, ham dåt stuk önjkiike. Önjt gehiil as et 5 tunge apfjart wörden.

• Stalfraidi di 14. april heet Frisia Historica åle lasmoote tu en ütfluuch tu e håli söödfall lååsid. Ma tra haingstewoine gäng et ouert heef. Aw söödfall jäif et wat tu ääsen, än en latj ferteeling am e håli.

• Üüsen ålereklub häi e 11. moi tu en uursütfluch eefter Stolbeerch lååsid. Tujarst jäif et e möölikhäid e üülj retauriirt meelen tu bekiiken, än eeftert häi Berta Marie kafe än kååge önj e meelen turuchte mååget.

• Bai e 62. FUEV-kongräs foon e 17. bit 21. moi önj Cluj-Napoca / Rumänien wus e Foriining ma Bahne Bahnsen än Ilse Johanna Christiansen fertrin.

• Di 20. moi heewe 10 ünlike gibselfloose wider am di jarste plåts önj e Gibselwråålsmäisterschap strääwet. Di jarste plåts füng jarling en floose foont Risem-Schölj.

• Üüse lasmooteferiin Rökefloose heet foon e 8. bit 9. juuli wider sin aktionwaagiinje for frasche jöögedlike önjbin. Di jarste däi gäng et eefter Hünning am aw e Treene Kanu tu käären, än di tweede däi wjarn ja önj Buleryp-Bov am Lasertag tu spaalen.

• Di 15. juuli heet et stjör hu geeste lååsid am bai söödweestjarn heefluupen tu gungen. Jörgen Jensen Hahn heet trinam wised, än et wjarn hu geeste foon e FUEV kiimen.

• Frisia Historica heet dan ouert waagiinje foon e 21. bit 23. juuli ål tut süst tooch en „madelålerlik driwen“ bai e bååsewäile önj Naibel döörfjard. Aw e mårket wörd üülj hoonwärk präsentiird än et jäif äinmåågede produkte tu kuupen.

• E Friisk Foriining wus foon e 24. bit 31. juuli aw en frasch jöögedspräkeräis önj Ladiinjen. Ma tou buse än ån liiwoin gäng et ma 19 manschne dil önjt sööden. Et wörd en trinam luked forheewen. Di huuchtepunkt foon e räis wus en spånktuur aw en 2700 meter huuge bärj.

• Di naie rädjjeewer for da manerhäide Johannes Callsen wus di 16. august tu besäk önjt Friisk Hüs am ham for tu stalen. Ferträäsere foon da ünlike frasche feriine wjarn deerbai.

• Önj e önjfång foont nai schöljiir köön inträsiirde wi naie fraschkurse önj Risem Schölj beleede. Ån for önjfångere ma Thora Kahl än ån for widerekiimene ma Ute Jessen.

• Tu e samerütfluch gäng et di. 16. septämber ma ån bus, än en ra priwootwoine tu e üülje huuwen foon Hollingstedt. Deereefter jäif et kafe än kååge önj Jübek, än tuleest füngen da diiljnaamere wat ouer et ååpelschap önj Hollingstedt tu waasen.

• Di 21. septämber, heet bundespräsident Frank Walter Steinmeier e manerhäiderädj foon e fjouer autochthone natsjonaale manerhäide önj Tjüschlönj tu en drååwen önjt Sloot Bellevue lååsid. E Foriining wus ma Bahne Bahnsen än Ilse Johanna Christiansen fertrin.

• Di 30. septämber häi Frisia Historica wi en harfstfäst än en weedstrid önj boogeschiitjen önj Hünebel organisiird.

• Önj Naibel köö följk di 30. Septämber ünlike institutsjoone än feriine bai e iirenåmts-mäse besäke. E Foriining häi tuhuupe ma „Et Nordfriisk Teooter“ än e Rökefloose än stånd apbaged.

• Et tweed teooterstuk Jonk Bradlep häi sin premiere di 1. oktoober. Et stuk hoonelt foon en jung wüset, wat åltens wi foon en spoosien ünbekånden hiimseecht wårt. 3 tunge köö et for en måst ütferkååften sool wised wårde.

• Bait 30. Friisk Harfsthuuchschölj awt dånsch följkehuuchschölj önj Jarplund wjarn mör as 60 diiljnaamere foon e 19. bit 22. oktoober. Önjt program wjarn maning ünlike workshops, weer t.b. ma hoolt, praliine, papiir, unti parlekääde årbet wörd. Önjbin wörd uk praageln, hafstdeeko bastle, frasch for önjfångere än en ütfluch önj eefter Slasvik önjt St. Johannisklooster. Di een wörd e wunerfilm „Amama“ foont leest Filmfestival wised.

• Foon e 3. – 5. nowämber köö huum aw Oomram bai e Konferänts tuhuupe ouer e tukamst foon da frasche diskeriire. Önj mörere berike, sü as bilding, meedie, kunst, politiik än et fermadeln foon spräke wälj e Frasche Rädj da müülje for e tukamst diskeriire än dan da resultoote önj en resulotjsoon tuhuupefoote.

• E FUEV häi foon e 8. bit 9. Nowämber tu en Non-kindstate drååwen önj Rom lååsid. E Friisk Foriining wus ma Bahne Bahnsen fertrin.

• E SSF häi tou ferträäser foon e Foriining lååsid än kam ma tu e Folketingstuur foon e 16. – 18. nowämber eefter Kuupenhuuwen. E Foriining wörd döör Bahne Bahnsen än Susanne Bahnsen fertrin

• Et leest teooterstuk foont nordfriisk teooter ”Et Hulk kiirt tubääg” wus en jülstuk. E premiere wus di 1. adwänt (3. detsämber), än et kömen maning familie ma jare bjarne am et stuk tu siien. Besuners da bjarne wjarn ouremätje önjdänj foont stuk.

• Üüsen ålere-klub häi e 14. detsämber lååsid tu en fiirliken adwänts-eeftermadi önj e Friesenhalle önj Lunham. As geeste köön Thora Kahl än ha doochter Miie Kahl begröötet wårde. Ja unerhüüljen ma hu jülsunge.

• Di 14. detsämber häin hu diligiirte foon e Foriining än drååwen ma e dånsche schöljferiin, am am e tukamst foont tuhuupeårbe tu snååken. Frasch schal önj tukamst ooftinger önj e liirploon for dånsche schoule stönje.

• Tut buume soomeln foor e biike drååweden ham e 27.01 ferträäser foon da frasche feriine. Deereefter jäif et dan nuch puns än stjüte ine bai Thore.

• Tut wunterfäst ma gräinküüljääsen önj Risem di 2. februar kömen 115 lasmoote än waane foon e Foriining. Eeftert gräinküülj heewe bjarne foont Risem Schölj et teooterstuk „e doonserin foon Hoyerswort“ apfjart. Eeftert heet di naie jöögedfloose Shu-Shaan et stuk „Di papagoi” uner e liidjing foon Oke Erzinger apfjart.

• Tut biikebrånen wus di biikebunke jarling en lait latjer. Önj e nåcht for biike as di bunke önjtånd wörden. E füürweer heet e bunke dan nuch ruchtidi ütmååget, sü dåt et likes nuch en fain iilj wus. Awäädrie wörd tu fäst eefter Risem önjt ”Fraschlönj” lååsid. E biikereede wörd hülen foon Jörgen Jensen Hahn. Eeftert teooter ma ”En mör tufali ferbreegen” foon e Rökefloose jäif et dan diskomusiik ma Dirk Bork.

• Di 22. februar häin Karin Haug, Claas Riecken än Gary Funck ünlike frasche tääle uner e tiitel Frasche tääle tu Padersdäi önj Lunham önjt Eichhorns forleesen.

Wat as ouers nuch schaid?

• Et stjör heet ham önjt fergängen årbesiir soowen tooche tu meetinge drååwed, am da feriinsforheewen tu ploonen än eeftertubehooneln.

• Nuch bit tu e 3. april 2018 as tid tu än soomel iinj miljoon unerschrafte for e bürgerinitsjatiiwe Minority Safe Pack. E „Minority Safe Pack Initiative“ as en påk üt ünlike forsliike for ruchte, wat et stipen foon natsjonaale manerhäide sääkere schal. Et hoodmüülj as e ruchtlik sääkering foon e manerhäide önj Europa.

• Ouerdåt et Galerie Café sunt septämber ai mör önj bedrif as, schölj e ålereklub gau en ouder stää fine, weer ja jam iinjtooch önj e moune drååwe koone. Deeram drååwet ham e ålereklub nü önj e Friesenhalle önj Lunham tu en meekliken eeftermadi ma forleesen, schungen, koordespaalen än snååk.

• E „Schnaps Companie“ ferkååft ouf nü köömbutle ma en etikät, weer „E sung foon e teepuns“, än üüs loogo aw pranted as.

• En naie frasche musiikfloose ”Frisia non Cantat” as grünlait wörden, än häi ål maning aptreese önjt leest iir. Ja spaale fort mååst madelåler musiik.

• E Foriining heet nü en äin Facebook sid, weer et informatsjoone, bile unti et arken törsdi ”Et uurd foon e waag” jeeft.

• Önjt fergängen årbesiir as en årbesfloose grünläit wörden, am et projäkt Frasch online uurdebök wider tu braingen.

• Bai Friisk Funk än önjt interneet koon huum uner „friiskforiining.podspot.de“ foon moundi bit fraidi tisinge aw frasch hiire, en tiinst foon e Friisk Foriining.

• Foon üüs lasmooteblees ”Friisk Tising” san trii ütgoowe rütkiimen.

• Aw üüs sekretarioot önjt Friisk Hüs koon huum frasche lukwanschkoorde füünj.

Wat kamt aw üs tu?

• Et Huuwen-Hüüschen (Musical)

7. april kl. 20.00 önj e “Stadthalle”, Naibel
8. april kl. 17.00 önj e “Alter Kursaal”, Weesterlönj/Sal
9. april kl. 20.00 önjt Husumhus Hüsem

• Frasche schriwkurs ma Manfred

3.-5. april kl. 09.00 – 16.00 önjt Friisk Hüs.

• Tuhuupe Luupe (fiiljkääre)

18. bit 20. moi foon Bräist eefter Ljouwert

• Gibselwråålsmäisterschap

5. moi kl. 13.00 bait Risem Schölj

• Spräkeräis eefter Baskenlönj

8. – 14. juuli

• Naie frasch-kurse

ouf 7./8. septämber önj Risem Schölj

• Samerütfluuch

15. septämber

• 31. Harfthuuchschölj

11. – 14. oktoober önj Jarplund

• 7th European Minority Film Festival

16. – 17. Nowämber önj Hüsem

Bahne Bahnsen, 1. formoon