Frisia Historica fiirt sin 10-iiri jubiläum

Laawen as da frasche for duusend iir – dåt as et müülj foon e frasche madelålerferiin Frisia Historica. For tiin iir wörd di feriin önj e Hüneblinger Kuuch bai Stääsönj grünläid än heet ham sunt dan besuners döör sin grute wäilefäste önj Naibel bekånd mååged. Di feriin seet ham uk in for frasch kultuur än frasche spräke, as lasmoot bai e Friisk Foriining än teelt ham tu e frasch manerhäid.
E tiinde iirdäi wal Frisia Historica nü fiire ma en öfentlik „Troolfäst“ än saneene, di 18. septämber önj sin klubhüs önj e Hüneblinger Kuuch. Enarken as hartlik wäljkiimen, et jeeft en weedstrid önjt boogeschiitjen, en noopemårket, kafe än kååge än natörlik wård uk grild. Uk iinj e tuurst wårt wat mååged ma madelålerlike likööre än meet unti koul biir üt e hunke. For musiik sörit tubai oudere di weestfrasche metalfloose Baldurs Draumar. Mör informasjoon fäit huum uner www.frisia-historica.de.