Dootem: 5. April 2017

Friisk Foriining – iirsberucht 2016/2017

Iirsberucht 2016/2017

Tu üüs leest lasmootefersoomling (17. märts 2016) kömen 28 lasmoote än fjouer geeste. Uurdfäärer wus Alastair Walker. Et prutukol, schraawen foon Enke Christiansen, wörd foont stjör aw en drååwen e 29. märts 2016 gödjkånd.

Sunt e leest fersoomling hääwe we as naie lasmoote bai üs önj e feriin apnümen: Asmus Andresen ma sin bjarne Bent Andresen, Sünje Marit Andresen än Leif Bjarne Hannes Andresen, Wolter Jetten, Nils Langer, Dr. Fritz än Ilona Petersen, Meike Riewerts, än Christoph Winter.

Störwen san önjt fergängen årbesiir: Erwin Herbener än Hark Martinen.

 

Tut leest årbesiir

  • Üüsen ålereklub häi e 12. moi tu en uursütfluch eefter Bräist lååsid. Tujarst gäng et tut Nordfriisk Instituut, weer e nai ütstaling tu e frasche spräke önjt Nordfriisk Futuur wised wörd. Eeftert jäif et kafe än kååge önjt Café Frida.
  • Bai e 61. FUEV-kongräs foon e 18. bit 22. moi önj Wroclaw / Breslau wus e Foriining ma Bahne Bahnsen än Ilse Johanna Christiansen fertrin.
  • Foon e 3. bit 5. juuni wjarn en diilj lasmoote foon e Foriining ma tut interfriisk drååwen aw Hålilönj, organisiird foon e Frasche Rädj.
  • Bai e treed fötjbål-euroopamäisterschap for manerhäide (Europeada) önj Söödtirool foon 18. bit 26. juuni heet e Friisk Foriining ma en moonschaft üt Nordfraschlönj diiljnümen. Eefter e forrunde wjarn ja kiiwenooch rüt üt et turniir. Iin spal häins wünen, bai iin spal stöö et lik, än iin spal hääwes ferlääsen.
  • Üüse lasmooteferiin Rökefloose wus foon e 16. bit 17. juuli wider sin aktionwaagiinje for frasche jöögedlike önjbin. Di jarste däi ging et eefter Sankt-Peter am tu Surfen, än di tweede däi wjarn ja önj Buleryp-Bov am Lasertag tu spaalen.
  • E Friisk Foriining wus foon e 11. bit 18. august aw en frasch spräkeräis aw et kanoolailönj Jersey, weer et nuch am en bai 1000 spreegere foon e normanische dialäkt Jèrriais jeeft. E diiljnaamertål wus foon began aw 20 fååstläid, än da plåtse wjarn gau ütböked. Et wörd en trinam luked forheewen ma maning naie informatsjoone am et manerhäidelaawen aw Jersey.
  • Önj e önjfång foont nai schöljiir köön inträsiirde wi naie fraschkurse önj Risem Schölj beleede. Ån for önjfångere ma Thora Kahl än ån for widerekiimene ma Ute Jessen.
  • Aw Mikkelberg önj Haatst wörd di 09.09 e 100 iirdäi foon Margaretha Erichsen fiirt. Üüse formoon Bahne Bahnsen heet gröötuurde ütruchtet, än am e frasch sid foon Margaretha Erichsen ferteeld. Tubai wus uk än ütstaling foon ha bile.
  • Di samerütfluch gäng e. 10. septämber ma en bus, än en ra priwootwoine eefter dånsch. Tu jarst wjarn we önj Hadersleben, ma en fääring döör e doomschörk, än dan gäng et eefter Christiansfeld, for kafe än kååge, än weer Marie Tångeberg wat am e stää ferteeld.
  • Üüse lasmooteferiin Frisia Historica heet dåt waagiinje foon e 17. bit 18. septämber sin tiiniiri bestönjen önj Hünebel fiirt. Ma önjt program wus boogenschiitjen, swjardstrid, iiljshow, än maning konsärte foon ünlike floose.
  • Di 28. än 29. septämber wjarn tou ferträäser foon da frasche ma e Dialog Forum Norden aw en stuudieräis önj Brüssel.
  • Üüse geschäftsfäärer Manfred Nissen as eefter 34 iir önj ränte gängen. Di 30.09 wjarn waane än koleege önjt Friisk hüs, am adjiis tu Manfred tu seeden. Awfoorie häi hi nuch e möölikhäid san eefterfülier Ilwe Boysen in tu årben.
  • Bait 29. Friisk Harfsthuuchschölj awt dånsch följkehuuchschölj önj Jarplund wjarn mör as 50 diiljnaamere foon e 30. septämber bit tu e 3. oktoober. Önjt program wjarn maning ünlike workshops, weer t.b. ma hoolt, papiir, unti parlekääde årbet wörd. Önjbin wörd uk doons, karbaret, frasch for önjfångere än en ütfluch önj eefter Hüsem tu en Rungholt ütstaling. Di een wörd e film foont wunterfäst teooter wised.
  • E 12. oktoober wjarn da ålere lasmoote tu en meekliken eeftermadi inlååsid. Tujarst gäng et eefter Foortuft, weer da wüste en påpeütstaling, än da kjarls et museum önjt schöljgebüüde beseechten. Eeftert jäif et dan kafe önj e Horne.
  • Tuhuupe ma Nord- än Söödslaswikere hääwe we dåt teooterprojäkt ”Adding Sights” döörfjard. Deerbai hääwe jam frasche, dånsche än tjüsche manerhäide-teooterspaalere foon e 15. – 23. oktoober önj Leek inkwartiirt. En arken floose heet en teooterstuk inööwed wat bait iinje foon e waag önj Leek, än e 2. nowämber önj Hadersleben foor än briidj publikum apfjard wörden as. Et projäkt wörd stiped ma Kurskultuur–neetwärkmadle.
  • Önj Strükem bai e B5 jeeft et nü sunt iinje oktoober hu wäiwisere bai e stroote uk aw frasch. Bit iinje 2017 schan åle wäiwiser-schilde önj Nordfraschlönj twäärspräklik weese.
  • Foon e 23. bit 26. nowämber heet e Friisk Foriining fort süst tooch et ”European Minority Film Festival” önj Hüsem ütruchtet. Dåtheer tooch köö et festival sin 10 iirs bestönjen fiire. Et wörden spalfilme aw waliisisch, baskisch, weestfrasch, än catalaanisch wised. Di saneene slüütj et festival ma en grut filmgaala önj Husumhus ouf.
  • E 01. detsämber wus en frasch delegatsjoon for tou deege önj Berlin weer di manerhäiderädj ham ma Thomas Krüger, än Hartmut Koschyk drååwed.
  • Üüsen ålere-klub häi e 8. detsämber lååsid tu en fiirliken adwänts-eeftermadi önjt Galerie Café önj Lunham. As geeste köö Luise Clasen Thora Kahl än schoulere foont frasch dånsch schölj üt Risem begrööte. Ja unerhüüljen ma dachte än jülsunge.
  • Di 23. detsämber heet e Foriining ma en ra junge frasche wi en sü nåmd müüstische stäägne jültuur döörfjard. Jarling gäng et eefter Flansboi.
  • Tut buume soomeln foor e Biike drååweden ham e 14.01 ferträäser foon da frasche feriine. Deereefter jäif et dan nuch puns än stjüte ine bai Thore.
  • Tut wunterfäst ma gräinküüljääsen önj Risem di 3. februar kömen 95 lasmoote än waane foon e Foriining. Eeftert gräinküülj jäif et live-musiik ma e Mahara as musical-schungster, än Constance bait klawiir. Dan heet Karin Haug for spoos än unerhüüljing for enarken sörid ma „Huum koon dåt dan waase?“
  • Di 20 februar häi e Friisk Foriining än drååwen ma e dånsche schöljferiin, am am e tukamst foon e fraschunerrucht aw dånsche schoule tu snååken. Er wörd beslin dåt we üs tou tooche önjt iir drååwe, weerbai da schöljmäister foon åle schoule önj Nordfraschlönj bai ån foon da drååwen deerbai weese schan.
  • Tut biikebrånen – jarling aw en saandi – häin da frasche feriine önjt toorp tujarst tut iilj eefter Lunham än awäädrie tut fäst eefter Risem önjt ”Fraschlönj” lååsid. E biikereede wörd hülen foon Florian Lorenzen. Eeftert teooter ma ”E wäär wjard amt täälelönj” foon e Rökefloose jäif et dan diskomusiik ma Dirk Bork.


Wat as ouers nuch schaid?

  • Et stjör heet ham önjt fergängen årbesiir soowen tooche tu meetinge drååwed, am da feriinsforheewen tu ploonen än eeftertubehooneln.
  • Üüsen ålereklub drååwet ham widerhaane iinjtooch önj e moune önj Lunham önjt Galerie-Café tu en meekliken eeftermadi ma forleesen, schungen, koordespaalen än snååk.
  • Foon üüs lasmooteblees ”Friisk Tising” san trii ütgoowe rütkiimen.
  • Aw üüs sekretarioot önjt Friisk Hüs koon huum frasche lukwanschkoorde füünj.
  • Bai Friisk Funk än önjt interneet koon huum uner „friiskforiining.podspot.de“ foon moundi bit fraidi tisinge aw frasch hiire, en tiinst foon e Friisk Foriining.
  • Nuch bit tu e 31. märts koon huum naie frasche musiik stöögne bai e Frasche Rädj inschake am bai e 3. frasche musiikweedstrid ma tu måågen.

 

Wat kamt aw üs tu?

  • Fordreeging am Berthold Bahnsen önj Leek (21. märts)
  • Jarst stuk „da üülje da goue“ foon „Et Nordfriisk teooter“ (2., 4., 6., än 9., april önj e Nordseeakademie Leek, än 30. april, än 2. moi önj Hüsem, Husum hus)
  • Gibselwråålsmäisterschap (20. moi)
  • 6. Friesisch-Historisches Treyben önj Naibel (21./23. juuli)
  • Jööged Spräkeräis eefter Ladinien (24. – 31 juuli)
  • Samerütfluch (9. septämber)
  • Naie frasch-kurse önj Risem Schölj (12./13. septämber)
  • 29. Friisk Harfsthuuchschölj önj Jarplund (19. – 22. oktoober)
  • 3. Musiikweedstrid (11. nowämber)

 

Bahne Bahnsen, 1. formoon