Kultuurkonsulänt iirsberucht 2010/2011

Iirsberucht kultuurkonsulänt

2010 / 2011

Liiwe lasmoote,

uk jarling koon ik as jarnge kultuurkonsulänt wider aw en bröket än, as me tänjt, gåns erfålgrik iir tubääg kiike. Deeram heer en kort ouersåcht ouer hu foon e wichtiste aktiwitääte foont leest iir:

Di 3.5. wjarn Manfred än ik e hiile däi tu en grut meeting foon åle möölike  manschne üt e kultuurberik üt e Regjoon Slaswik-Sönderjylland. Bai e konferänts gäng et am e bewiirwing foon Sonderborg än e Regjoon Slaswik-Sönderjylland as europääisch kultuurhoodstää 2017. Et  bewiirwingsferfååren låpt ål, än wan et wat wårt, san we frasche ma deerbai.

Di 28.-30.5. wus wider stäärfåårt eefter Hålilönj, än deer hääw ik, sü as da leeste tunge uk, e friiske sport- än spalweedstrid organisiird. Süwat 30 sportmååns än -wüste üt åle Fraschlönje hääwe mamååged, deertu köm nuch en gruten bunke ma tukiikere. Uk wan da nordfrasche jam wörklik gödj hülen hääwe, gäng e pokaal jarling fort jarst tooch eefter Weestfraschlönj.

Di 4.-6.6. hääwe Manfred än ik ma en infostånd e Friisk Foriining aw e Slaswik-Holstiin Däi önj Rendsborj fertrin. Forålem üüs schoulbord heet maning manschne önjtäägen. Stiped wörden we deerbai åle 3 deege foon Anni Karnebogen än stünewis foon Ilse Johanna Christiansen än Lars Harms.

Foon e 4.-6.6. gäng sü as arks iir ma da fraschschoulere foont dånsch schölj önj Bräist uner e liidjing foon Christiane Bodenhagen än tuhuupe ma Manfred Nissen aw fiiljtuur eefter Naischöspel.

Foon e 15.-18.7. häi ik di bretoonsche fiiljkäärer Emmanuel Le Merlus bai me tu besäk. Di moon wus aw en fiiljtuur döör hiilj Europa, am åål manerhäite tu besäken. Sin tuur wörd ferfülid döör åle möölike meedie. 3 deege lung wised ik ham tuhuupe ma oudere da frasche institutsjoone foon Nordfriisk Instituut bit Andersen Hüs. Foole tunk gungt heer besuners tu Güde Boysen, wat ordi hülpen heet.

Di 4.9. hätj et wider „Gibselmania“, dåt as üüs nordfrasch mäisterschap önjt gibseln. En hiilen eeftermadi wörd aw e sportplåås foon Risem Schölj am e weed gibseld. Uk jarling gäng e pokal wider tut tiim „BeuteBoysen“.

Di 12.9. jäif et önj Bräist et grut spräkefäst tu e 40ste iirdäi foon e kris. Manfred än ik häin wider en stånd ma schoulbord, wat gödj önjnümen wörd. Aw e grute spalteele hääw ik dan uner e tiitel „En fiirngstün frasch“ en fraschen crashkurs ma tukiikere än pasante mååged.

Bait harfsthuuchschölj foon e 8.-12.10. hääw ik ai bloot önjt organisatsjoonstiim mauuged, ouers uk möre workshops seelew önjbin. Besuners di, weer huum knüfeln spaale koon, wårt åltens wi gödj önjnümen.

Sunt 21.10. hääw ik nü uk en öfentlik kåntoor önjt Friisk Hüs önj Bräist. Besuners di törsdi koon följk me deer önj e räigel önjdrååwe.

Grut highlight önjt iirsprogram, uk wat e årbestid önjgungt, wus et 3rd European Minority Film Festival, wat Manfred än ik foon e 18.-20.11. organisiird hääwe. We wiseden 4 spalfilme foon sünåmde latje följke üt åle jarne foon Europa än slüütjen ouf ma en grut gala, weer üüs waane foon e sinti, rätoromaane än sügoor foon Feer for musiik söriden. Di pris gäng jarling eefter Wales, än di publikumspris gäng tu e film Pudana am e nentsen önj Siberien.

Önj e januar draid ham dan mååst arken däi am teooter. Tuhuupe ma Güde Boysen hääw ik et stuk „Pidder Lyng“ schraawen än uk e musiik deerfor komponiird. Dåt gånse wörd dan ma üüsen jöögedteooterfloose Dolores inööwed. Mååst arken däi wus e floose önj e gung, än et jäif uk sü as arks iir en komplät waagiinje fort ööwen önj e jöögedherbärje. Di aptrees di 04.02. bait wunterfäst as üs dan uk wörklik gödj luked. Grut komplimänt tu üüs junge schauspaalere än en tunk tu Frisia Historica, wat üs ma rekwisiite än uk „manschlik materiool“ fersöriden.

Bili kortfristi önjtschiiseden we üs än mååg en grut apfääring ma e „junge Stimmen des Nordens“ foon Feer än et musical Mary Poppins. Tachten kontakt tu e famiili Rethwisch füng ik döört film festival, weer ja aw e gala apträtjen. Ouerdåt deerbai uk da stars foon Stanfour mamååge än e famiili Rethwisch uk ouers bili foole ma profäsjonäle musiikprojäkte önj e gung as, köön we deerbai foole oufkiike än liire, uk wan et ai aw friisk wus. Ik wus ferwunerd, då we ma en wörklik kort forluuptid – twasche stjörbeslit än aptrees läin 3 waage, twasche jarste bleeseartiikel än aptrees mån 5 deege – di sool ful füngen. Ouerdåt uk bai en ful hüs da ünhiimlike huuge koostinge for tächnik, jåcht, personaal än band ai döör e intrees finantsiird wårde koone, heet e famiili Rethwisch et finantsjäl defitsiit, möre duusend Euro, seelew dreegen.

Di 25.3. köön Uffe Iwersen, kultuurkonsulänt bai e tjüsch manerhäit önj Nordslaswik, än ik tuhuupe ma maning aktööre et hiirspalprojäkt „E krouf bai e Wiidou“ önj Rosenkranz öfentlik präsentiire. Tum gruten diilj finantsiird foon e Regjoon Slaswik-Sönderjylland ma Interregmadle, as dåt projäkt iinjsen wat fåli nais: Da aktööre önj da 18 episoode, ark stuk süwat 3 minuute lung, snååke önj e fiiw spräke foon e weestküst: Friisk, Sönerjüüsk, Plåttjüsch, Tjüsch än Dånsch.

Da episoode koon följk t.b. önjt interneet hiire uner www.vidaakro.dk.

 

Gary Funck

kultuurkonsulänt

Lasmoot wårde

Wård lastmoot önj e Friisk Foriining

Hark iinjsen

Di frasche podcast for enarken wat hål frasch hiire wal.