Huum san e nordfriiske?

gölj - rüüdj - ween: da friiske blaie

Da friiske san tubai da dånsche, da sorbe än da sinti/roma jü fiird ofitsjäl önjerkånd natsjonaal manerhäid önj e Föderaal Republiik Tjüschlönj. Ja laawe önj e kris Nordfriislon än awt ailönj Hålilönj bai e weestküst önjt lönj Slaswig-Holstiinj. Da friiske wårde sunt 1990 ofitsjäl schööld än stiped eefter artiikel 5 önj e loonsferfooting.

E friiske spräke as et wichtist identifikatsjoons-kåntiiken for da nordfriiske. Süwat 10000 manschne snååke di spräke aktiif. Et friisk as apnümen wörden önj e Europäisch Charta for reginaal- unti manerhäidespräke.

Et poliitisch årbe wård dräägen foon e Frasche Rädj, dåt san nüügen manschne, wat åle friiske foriininge än organisatsjoone repräsentiire. E Frasche Rädj fertreet da friiske ouerfor e bund, et lönj, e kris än e gemiinde. Tu tids as e Naiblinger Ingwer Nommensen foon e Friisk Foriining formoon foon e Frasche Rädj. Sunt 1988 bestoont et "Gremium für Fragen der friesischen Bevölkerungsgruppe im Lande Schleswig-Holstein" e ferbining tu e politiik än ferwålting, ai bloot önj e loondäi. Heer wård tou tooche önjt iir präiwed än liis probleeme for e friisk manerhäid.