Wäljkiimen aw e hüüsesid foon e Friisk ForiiningHeer fant huum åle informatsjoone ouer üüs kultuurpolitisch program, en termiin-ouersacht, maning friiske böke än cds, en jöögedprogram, en link tut jarst friisk webradio, üüs aktuäle präsemadiilinge än nuch foole mör.2003 köö e Friisk Foriining har 80-iiri jubiläum fiire. Jü 1923 uner e noome "Friesisch-Schleswigscher Verein" grünläid Foriining betråchtet foon önjfång önj e friiske spräke än e friisk kultuur as en äin än likberuchtid grutelse önjt tjüsch-dånsch gränslönj. Et hoodmüülj foon e Foriining as et årbe fort bewååren än ütbagen foon e friiske spräke än en friisk identitäät. |
Huum san we?Amenbai 10.000 manschne önj Nordfriislon än aw Hålilönj snååke friisk, än dööwelt sü maning koone et ferstönje. Di friiske spräke, wat åliine önjt Weestfriislon (Neederlönje) foon 350.000 än önjt ååstfriisk Seelterloun foon 2.000 manschne snååked wårt, as et wichtist kriteerium for än wees friisk.E friiske följksfloose heet eefter artiikel 5 foon e slaswik-holstiinjsch loonsferfooting et rucht aw än wård schööld än stiped. Sunt 2004 sääkert et friisk-gesäts et rucht aw e friiske spräke önj e öfentlikhäid än stalt fååst, dåt följk ham tu e friiske följkefloose bekåne mätj. Ål 1988 wörd döört inruchten foont “friisk-greemium” di diräkte kontakt tu da beslitene orgaane foon e loondäi schääm. Deer ütouer jeeft et sunt 2005 bai e bundesdäi en kontaktütschus for da friiske. E Friisk Foriining, wat bit 1933 ma en äin “Liste Friesland” bai woole apastald häi, heet eefter 1945 et tuhuupeårbe ma e dånsch manerhäid intensiwiird. 1948 wörd e Söödslaswiksche Wäälerferbånd (www.ssw.de) foon dånsche än friiske grünläid, am sü gemiinsoom da politische inträse tu fertreesen. Tu tids as üüs stjörlasmoot Lars Harms ån foon fjouer SSW-fertreesere önj e slaswik-holstiinsche loondäi. E Friisk Foriining heet süwat 600 lasmoote. Ouerdåt da friiske en äinen spräke än en äin kultuur hääwe, betråchtet e Friisk Foriining e friiske följkefloose as en äin följk än en autochthon manerhäid önj Tjüschlönj, sü as da sorbe önj e Lausitz. Et wichtist müülj for e Foriining as et bewååren foon än e stipe for e friiske spräke än kultuur. Önj tuhuupeårbe ma e jöögedferbånd  Rökefloose wårde t.b. aktiwitääte önj e fritids- än jöögedberik önjbin, weer for ålem friisk snååked wårt. Önj e berik schoule årbet e Foriining ma e dånsche schöljferiin tuhuupe, wat önj möre schoule friisk önjbüt än ma Risem Scölj (www.risumskole.de) et iinjsist schölj bedraft, weer e friiske spräke tubai dånsch än tjüsch uk unerruchtsspräke as.E Friisk Foriining organisiirt uk räise tu oudere spräkemanerhäide önj Euroopa än büt arks iir en friisk harfsthuuchschölj önj. Än dan heet e Foriining en tacht tuhuupeårbe ma e „Ferian för en nuurdfresk radioo“ (www.ffnr.de) am et friisk önj e film- än meediewråål tu stipen. Süwälj e radioferiin as uk e Rökefloose san as feriin lasmoot bai e Friisk Foriining. Önjt Stääsönj fersoomlingshüs as et “Stuudio Friislon” inruchted, weer arken fraidi foon e kl. tiin bit tweelwen än dåtseelew nuch iinjsen foon e kl. fiiw bit soowen di eeftermadi et friisk webradio (www.nfradio.de) produtsiird wårt än wat di saneene ouf e kl. nüügen e formadi uk önj e “ääme kanool weestküst” tu hiiren as. |
Vereinsbeschreibung
