Dootem: 9. önj e krülemoune 2011

Friisk Foriining – iirsberucht 2010/2011

Bai üüs leest lasmootefersoomling, e 29. april 2010, köön we 33 lasmoote än geeste begrööte. Uurdfäärer wörd Claas Riecken, än Enke Christiansen heet wider et prutukol fjard. Et wörd beslin än leed e fersoomling ouf 2011 en rewidiirden hüshüüljploon fort luupen iir for. Eefter e fersoomling stald Thede Boysen sin årbe as sekretariootsliidjer for da fjouer manerhäide önj Tjüschlönj for (dånsche, frasche, sorbe än sinti/roma).

Sunt e leest fersoomling köön we en ra naie lasmoote bai üs önj e feriin apnaame (Oliver Gantz, Wiebke Bade, Emil Ketelsen, Cees Helfrich, Elke Kirchner, Stefan än Sabrina Nissen, Marike Hoop, Kerstin än Holger Jürgensen, Thomas än Heike Oettgen), ouers et san uk möre lasmoote störwen. Foon üs gängen san: Christian Brodersen, Beergem, Helene Hansen, List, Momme Hamann, Läiged, Johannes Jensen, Flansborj, Annemarie Pohlmann, iir Klapphagen, Willy Thomsen, Naibel, Karl Günther Jensen, Damp än Richard Wippich, Stääsönj.

Tut leest årbesiir

• E 5. moi 2010 heet e Foriining Manfred Nissen än Gary Funck tu en ”idée-konferäns” eefter Padborg schakd. Et gungt am Sønderborg 2017 as möölik europäisch kultuurhoodstää, weer uk da manerhäide en rul spaale schan.

• Ån däi lääser häi üüsen ålereklub san uursütfluch eefter Låålönj (Toorpsmuseum) än Åktoorp.

• Bai e FUEV-kongräs foon e 13. bit 15. moi önj Ljubljana/Slowenien wus e Foriining ma formoon än 2. forwüset fertrin.

• Foon e 28. bit 30 moi wjarn we ma en delegatsjoon tut interfriisk drååwen aw Hålilönj. Üüsen jöögekonsulänt Gary Funck häi wi en sport-weedstrid organisiird.

• Et waagiinje 4. bit 6. juuni häi e Foriining en infostånd ma en schoulbord-weedstrid aw e Slaswik-Holstiinj-däi  önj Randsborg.

• Foon e 14. bit 16. juuni wjarn Christiane Bodenhagen, Manfred Nissen än Gary Funck ma da fraschschoulere üt Bräist aw en frasch fiiljtuur eefter Naischöspel.

• E 10. än 11. juuli häi Frisia Historica tu en friisk/histoorisch waagiinje eefter Stääsönj lååsid.

• Foon e 15. bit 18. juuli häi e Friisk Foriining besäk foon di Bretoone Emmanuel Le Merlus, wat awt fiilj döör hiilj Europa unerwäägens wus än reklaame for e bretoonsche ouers uk oudere manerhäidespräke mååged.

• En naien sliiks spräkeräis, en fiiljtuur döör Nordfraschlönj, wat we for made juuli forsänj häin, köm kiiwenooch ai tustånde.

• Ilse Johanna än Marlene Christiansen repräsentiirden da nordfrasche e 21. än 22. august aw en infostånd foon e natsjonaale manerhäide bait bundesbanenministerium önj Berlin.

• E 28. august måågeden we ma en floose foon 29 manschne üüsen samerütfluch eefter Haithabu, weer e ütstaling gåns nai mååged wörden as. Awäädrie gäng et tut A.P.Møller Schölj önj Slaswik.

• E Friisk Foriining häi dan e 4. septämber wi lååsid tut traditsjonäl gibselturniir, wat trinam Risem Schölj oufhülen wörd.

• E 12. septämber wjarn we ma en infostånd fertrin bait ”Fest der nordfriesischen Vielfalt”, wat tut 40-iiri krisjubiläum trinamt Instituut döörfjard wörd. Gary Funck häi ma en öfentliken frasch-kurs di originälste toochte.

• E 1. oktoober wjarn e 1. än 3. formoon än e geschäftsfäärer tu en spräkekonferäns önj Slaswik.

• Tu üüs Friisk Harfsthuuchschölj foon e 8. bit 12. oktoober wjarn we wi awt dånsch huuchschölj önj Jarplund. We häin dåttooch knååp 50 diiljnaamere.

• E 14. oktoober wjarn üüs ålere lasmoote aw harfstütfluch eefter Norstedt. Önj Jonnys Café jäif et en nat unerhüüljingsprogram tubai kafe än kååge.

• Saneene, e 16. oktoober häin üüs waane foon Frisia Historica eefter Stääsönj lååsid tu en madelåler-noopemårkt ma boogenschiitjen.

• Sunt e 21. oktoober san we ma üüs sekretarioot nü önjt Friisk Hüs önjt üülj Preisler-gebüüde önj Bräist unerbroocht. Heer diile jam e geschäftsfäärer än e kultuurkonsulänt e boower-etoosch tuhuupe ma e Frasche Rädj.

• E 30. oktoober drååwed ham et stjör foon e Foriining ma hu repräsentante foon oudere feriine tu en klausuurdrååwen önjt Friisk Hüs. Et wörd en resolutsjoon iinj e spåårploone foont lönj beslin.

• Önj e nowämber wörden we üs ma Claas Riecken iinjs am, dåt hi üs en dokumäntatsjoon schraft ouert frasch/dånsch tuhuupeårbe sunt 1945.

• Foon e 18. bit 20. nowämber köö e Friisk Foriining et nü ål treed ”European Minority Film Festival” önj Hüsem ütruchte. Di leeste däi slüütj ma en grut filmgaala önj Husumhus ouf.

• E 9. önj e jülmoune häi üüsen ålere-klub lååsid tu en fiirliken adwänts-eeftermadi önjt Galerie Café. Dåtheer tooch ma Thora Kahl än schoulere foon Risem Schölj än e bjarnetün.

• E 13. januar 2011 wörd tu en gåns wichtien däi for Luise Clasen. Jü wus aw forsliik foon e Friisk Foriining lååsid tu e naiiirsemfång foon bundespräsident Wulff.

• Ouert waagiinje 29./30. januar heet Frisia Historica fort jarst tooch en madelåler- än moudemårket önj Naibel döörfjard.

• Üüs wunterfäst ma gräinküüljääsen fiirden we ma ouer 100 moon sü as åltens e jarste fraidi önj e februar. E teooterfloose Dolores häi jarling ma heelp foon Gary Funck än Güde Boysen ”Pidder Lyng” inööwed.

• Bai Ute Jessen koone süwälj önjfångere as uk widerekiimene en gou frasch liire. Di 8. februar köm en naien kurs for önjfångere önj e gung.

• Twasche wunterfäst än biikebrånen seeten we dan nuch kortfristi en musikal awt program: ”Die jungen Stimmen des Nordens” foon Fäär lookeden ma ”Mary Poppins” ouer 300 manschne önj e sool foon Husumhus.

• Tut biikebrånen (21. februar) häin da frasche feriine Rökefloose, Frasche Feriin for e Ååstermååre än Friisk Foriining jarling wi eefter Risem önjt ”Fraschlönj” lååsid. Hans-Walter Sievert hül e biikenreede, e Rökefloose häi ma ”Fraschlönj 21” en modärn teooterstuk inööwed, än awäädrie spaald Dirk Bork ap tu doons.

• E 25. märts köön we ma e „Krouf bai e Wiidou” en hiirspalseerie önj åle fiiw spräke foont weestlik gränslönj präsentiire. Et wus en gränsouerschriden projäkt foon e Friisk Foriining än e Bund deutscher Nordschleswiger.

Wat ouers sü låpt

• Üüsen ålereklub drååwet ham widerhaane iinjtooch önj e moune önj Lunham önjt Galerie-Café tu en meekliken eeftermadi ma forleesen, koordespaalen än snååk.

• Et stjör heet ham önjt fergängen årbesiir nüügen tooche tu meetinge önj üüs fersoomlingshüs önj Stääsönj drååwed.

• Foon üüs nai blees ”Friisk Tising”, wat üüs lasmoote ma e pust foue, san önj e luup foont iir sü as ploond fjouer ütgoowe rütkiimen.

• Sunt tou iir jeeft et nü ål fiiw tooche e waag tisinge aw frasch, finantsiird foon e Foriining än spräägen foon Gary Funck. E siinjing kam nü åltens am e kl. nüügen di mjarn eefter e siinjing foon Friisk Funk än koon as ön jt interneet as podcast uner „friiskforiining.podspot.de“ tu ark tid tu hiiren.

• Thora Kahl soomelt iinjtooch önj e moune en frasche kroulfloose önj e Risemer bjarnetün. Deertu fäit jü ouf än tu en latjen stipe.

Wat kamt

Fort luupen iir ploone we en jöögedspräkeräis eefter Weestfraschlönj (juuli). Än tu üüsen samerütfluch (27. august) än tut friisk harfsthuuchschölj önj Jarplund (7.-11. oktoober) måån we jam heerma åltumååle inlååsie.

We koone jarling uk wider latje projäkte stipe ma giilj üt e Carsten-än-Alfred-Boysen-Fång: insäke koon huum nuch bit tu e 30. april.

 

Jörgen Jensen Hahn, 1. formoon